اڳوڻي آمريڪي نائب صدر ”ايل گور“ جي صلاحڪار ’ليئون فيُورٿ‘ (Leon Fuerth) طرفان استعمال ڪيل هي اصطلاح ، حڪومتي وهنوار هلائڻ دوران پيش ايندڙ تفصيلي معاملن بابت ، ترتيبوار سوچ ۽ گهڻ - رُخي ڳڻ- ڳوت کي نروار ڪري ٿو. هي تصور ”مستقبل جي مطالعن (Future Studies) ۽ پيچيدهه سرشتن (Complex Systems) وارن تحقيقي طريقن تي بيٺل آهي ، جيڪي واضح ڪن ٿا ته: (ا) بنيادي سماجي تبديليءَ جي رفتار ڪنهن به سماج طرفان اهڙي تبديليءَ جي ”قبولڻ واري سگهه“ سان مشروط آهي، يعني جيڪو معاشرو جيترو گهڻو تبديل ٿيڻ گهرندو، اوتري اتي تيز تبديلي ايندي. (2) تبديليءَ جي حوالي سان حڪومتون جيترو وڌيڪ سهڪار آڇينديون، اوترا وڌيڪ ڪارائتا نتيجا ملندا (3) اهڙن سرشتن جو هجڻ ضروري آهي، جيڪي ملڪي حڪومتن کي، ايندڙ دور جي تقاضائن بابت اڳواٽ آگاهي ڏيندي، کين نئين دور سان مکا ميلي جي مناسب صلاحيت بخشين .”اڳ ڳڻتيءَ“ وارو تصور ٻڌائي ٿو ته سماج کي درپيش مسئلن کي منهن ڏيڻ لاءِ نين تقاضائن جي ضرورت آهي، ڇاڪاڻ جو اهي مسئلا هاڻي ٻين معاملن سان لاڳاپجي پهلودار ٿي چڪا آهن. خاص طور تي رياستي ۽ حڪومتي معاملن ۾ گهرو ۽ پرڏيهي پاليسيون هڪٻئي سان سنوت ۾ نه هئڻ سبب، حڪمرانيءَ سان لاڳاپيل معاملا ڏينهون ڏينهن پيچيده ٿي رهيا آهن. اهي معاملا اڳواٽ اپاءُ وٺڻ ۽ نيتين جي هڪ ٻئي سان سلهاڙجي حل ٿي سگهن ٿا